Ane sibenevierzgi

Doozmool hammöör, da haasst, i met minen Eitere ond no vier Schwöschtere, im Erle hänne gwoont. Wännd döt bim Apezällerhöfli abigloffe ond be Zäches Spezereilädeli om der Egge choo bescht, häscht rächts e grosses, alts Giebelhuus met wiiss gstrechne Schändle gsäche. Mör sänd natürli no z'Miet dinne gsi, ond sHuus hät em Grampooli khört.E Stokk vorem Huus isch de Luuterbach doriggange ond hät am zNacht in Schloof ini ploderet. Öberem Bach äne isch em Lände-Willi sinn Bronne gstande. Ond äbe omm de säb Bronne isch ane sibenevierzgi ggange, im säbe heisse Sommer. Wa möör Goofe aas im säbe Bronne äne khokket sänd, met em Wasser gspillt ond töögglet hand, bes mör amel pflotschnassne hamm choo sänd ond dänn dezue häri no Chiib öberchoo hand!Im säbe Sommer isch afach all schö Wätter gsi. Zerscht häts am no choge guet gfalle. Abermet de Zit isch am äädlig vorchoo ond me hät allpott in Himmel ufiglueget, öb ächt näbe e Wolke ommi seg, wo chönnt rägne. – Aber jede Tag isch de Himmel chnötschblau gsi ond sisch e lengeri tröchner wore. Im Städtli isch sWasser nono wienen tönne Fade zom Haanen us cho ond ofzmool häts gano tröpflet.Aber üsere Bronne, im Erle hänne hät immer no oss de vollne Rööre usi plätscheret. E Gfell isch gsi, as me doozmool no nöd afl Wasser pruucht hät, wiemer hüt bruucht. Zom Choche hätmers pruucht, am Morge hättmer sGsicht demet abgflatteret ond am Samschtigoobet hätme dFüess gwäsche för de Soonntig, wänns nöd scho vom Räge oder dors Tööggle am Bronne gwäsche wore sänd.Ond etz sänds choo, fascht wien e Völkerwanderig, Lüüt os de Martgass, vo de Obergass, vom Engelplatz met Chessel, Milchchänntli, Chrüeg ond Schösslene sänds dehär cho ond hand bim Bronne öberem Bach äne Wasser kholt. DRöhre vo Ernst Willis Bronne hät all gliich vill Wasser kha. SWasser hät glanget för alli. Jede Morge ond jede Oobet sänds dehär choo di säbe Lüüt, wo soscht em Erle nöd vill noiggfrööget hand. Möör sänd natürli stolz gsi, as mör en därege guete Bronne kha hand.Wos dänn noch mee als eme Monet wieder cho isch gi rägne, hät das Glöüff osem Städtli almääli noiloo, ond möör hand de Bronne wider för üs elaa kha, ond im Städtli vorne hands sWasser wider chöne zom Haane usi loo.